ianod ang bato sa bul-og sa tubig

(hubad sa balak ni Willibrordus Surendra Broto Rendra nga iyang gibasa niadtong 1998 atol sa dakong demonstrasyon sa mga estudyante sa Indonesia nga nagpapukan ni Suharto)

Kay ang among kinaon kamote
Samtang nagkahabog ang tapok sa humay sa imong bodega…
Kay nagpuyo kaming nagsinardinas
Samtang haw-ang ang mga lawak sa imong dakong pinuy-anan…
Maong dili kita managsamag habig. Tungod kay kami nanimahog nagkabulingit
Samtang ikaw humot ug limpyo kaayo…
Samtang kami naghuot ug walay kagawasan
Samtang imong gitrangkahan ang pultahan…
Mao nga kami madudahon kanimo
Tungod kay kami ania biniyaan sa kadanan.
Ug ikaw ang tag-iya sa tanang silonganan…
Kay kami ania sa tunga sa baha
Samtang ikaw nagkumbira sa imong harianong sakayan…
Mao nga kami wala makauyon kanimo
Kay kami gitak-opan sa among mga baba
Samtang ikaw nagpadayon sa imong pagpangasaba…
Kay kami gihadlok
Ug ang imong buot maoy matuman pinaagi sa kusog…
Mao nga kami moingon kanimong DILI
Kay kami gidid-an sa pagpili
Samtang ikaw makabuhat sa tanan, bisan sa mga gidili…
Kay kami nagsinelas lang
Samtang sa bisan unsang takna ikaw makapamusil…
Kay gikinahanglang kami magmatinahuron
Ug ikaw adunay mga prisohan…
Mao nga DILI ug DILI alang kanimo
Tungod kay kami sama sa sug nga sapa…
Ug ikaw sama sa bato nga walay kasingkasing
Ianod ang bato sa kusog nga bul-og sa tubig.

-- LEO BOB FLORES

Bukit Batok, Singapore