samtang nagkaduol na ang tumoy sa dalan

Samtang nagkaduol na
Ang tumoy sa dalan,
Ang hangin mosugat kanimo
Daw suod mong higala.
Lamanohan ka sa mga tudlo
Sa paghandom,
Ug ang sapa sa sulod sa imong kaugatan
Nga hinay’ng nagdaligdig
Sa nagkahubas nga tubig,
Mobaha pag-usab.
Ug sama sa usa ka gapnod,
Ianod ka
Pagbalik ngadto sa taliwala
Sa lawod
Sa imong mga biniyaan.

Samtang nagkaduol na
Ang tumoy sa dalan,
Ang pinitik sa imong kasingkasing
Mga dagom nga motusok
Kanimo. Ug ang mga ulat
Mobalik sa ilang pagka samad.

-- URIAS A. ALMAGRO
New Berlin, Wisconsin, USA