bilar

Post-Traumatic
Stress Disorder
ang dokumentaryo
sa channel 4
alas singko
sa kadlawon.

Naghilak
ang mga sundawong
Kano ug Kana
samtang nagsaysay
sa ilang gipamatay
niadtong gubat sa Vietnam
ug kagubot sa Iraq.

Tingali og
sa laing adlaw pa,
ay, mor pa,
dili nako palabyon
ang mga bukton
nga nagyunyon,
mga bukog
sa buhi nga
nanglili
gikan sa
unod nga nagisi.

Apan karon, igo na
ang akoang pag-inusara
niining Paskoha lakip

ang akong kamingaw,
ug kabug-at sa paminaw.
(Kakuyaw kaha

kon madugangan!)

Mao nga akong gibalhin
sa laing istasyon diin
Sex and the City
ang salida karon.
Unang niatraka
si Sarah Jessica
sa iyang pangutana
karong episoda
kon...kuan...
tinuod ba kaha
nga malas kuno
ang mag-iyot
sa first date?


-- JONATHAN P. UBALDO
Okayama, Japan