oda sa kalubihan, banawa

(paghinumdom sa imong kanhing katahom)

Mahimong ang panumdoman
lamyon sa bakunawa
kon takdol ang buwan
ug inig piyong sa mga mata.

Apan dili mausab ang imong pamayhon
kay napatik na: ang tabunok

nimong yuta sa kakugnan,
ang lunhaw gihapon nimong bungtod,

kanang mga kiat nga mga sagbot
nga mahimong pungpong sa takyan
kada hapon gapangamay gihapon
sa nagtiniil kong kagahapon.

O, maaninaw gihapon
sa mga gaawop nga panan-aw

ang mga punuan sa lubi. Sa mga hakhak niini

motikang ko unya ug mosuway
sa pagpananggot sama sa pagpaawas

ni Noy Atyong sa iyang sugong sa tuba
didto sa kinatumyan

sa imong kanhi kalubihan.

Way bali kon lunlon semento,
ug habog nga mga kinoral didto karon
nagpauraray sa imong mga bukton
kay sa pagkatinuod, hangtod karon

tam-is gihapon nakong gihandom

ang tuba ni Noy Atyong.


-- GINA MANTUA-PANES
Cebu City, Philippines