11.19.2026

insomnia


(Kinutlo sa libro sa mga balak nga Alang sa Nasaag nga ilusad pag-usab inig Sabado puhon, ika-21 sa Nobyembre 2026, alas tres sa hapon didto sa Lost Books)

Sa gawas, madungog nakong nangambras 
sa dalan ang silhig-tukog sa kamanero. 
Ang tinulo sa hinayhay usa ka pinong 
uwan sa likod, ang vynil nga sawog 
nanimahog limpiyo. Alas singko nas 
buntag: ang lawas naghigda 
apan ang huna-huna usa ka sakayang 
way angkla. Unsa may laing mabuhat 
kon di paundayon kini? Mobangon, 
mobarog, mamutos. Ang huna-huna 
usa ka bus nga nagdagan sa dalan sa naandan: 
Minglanilla na kon trapik, San Fernando 
kon baho, Dumanjug kon naay nanabay. 
Sa taliwala sa semana, sa kilid sa dagat 
nag-unong ang lawas ug huna-huna, 
nahinanok. Ang dagat naghagok. 
Sa akong pagbangon, samtang nag-atubang 
sa tubig, nanghinaot ko, ang huna-huna 
parehas sa dagat sa Mayo: nagpauraray, 
linaw, hilom. 


 -- JONA BRANZUELA BERING 
Munich, Germany

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.