apologia pro vita sua

(pagpamalandong nga naaghat sa ulohan sa
duha ka kwadro ni Ivan Le Lorraine Albright)

Ang akong gimbuhaton maoy wa ko buhata.
Apan mosugot ko bisag di nimo sugoon.
Ang tawo gibuhat sa Diyos nga sama kaniya.

Di ko manghilabot sa butang nga di akoa.
Mokuot ko, tinuod, kon duna kay kuoton.
Ang akong gimbuhaton maoy wa ko buhata.

Matod nila baga akong nawong; hinonoa,
Akong kasingkasing usa ka pusgayng garapon.
Ang tawo gibuhat sa Diyos nga sama kaniya.

Aduna bay tulumanon nga wa ko tumana?
Ikaw bulahan kay di ko unsa kamug-oton.
Ang akong gimbuhaton maoy wa ko buhata.

Ako nakasabot, bisag wa nato sabota.
Gihuman ko bisan tuod di angayng humanon.
Ang tawo gibuhat sa Diyos nga sama kaniya.

Nahinayak lang ko, apan karon ulahi na
Wa ko tuyoa, apan gitugot sa higayon.
Ang akong gimbuhaton maoy wa ko buhata.
Ang tawo gibuhat sa Diyos nga sama kaniya.

-- VICENTE VIVENCIO BANDILLO
Dubai, United Arab Emirates