ang piano ug ang pianista

Sa akong atubangan
Gahulat ka sa akong mga tudlo

Sa akong hikap
Nga usahay malumanay unya
Moambak modagan molayat

Kon dili tika tagdon
Mangluod ka sa daplin
Magmugtok sa kahilom

Subo kang lantawon dinha
Sa imong nahimutangan
Nag-inusara nag-inusara

Gamay nako nga kuhit ug
Ang imong kiat mogimaw
Susama sa usa ka tiaw

Inig gitik nako sa imong
Mga ngipon nga naglinya
Modayon kag yawyaw og litanya

Tumban nako ang imong mga tiil
Ug ang imong singgit
Magpadayon hangtud

Kining imong asawa
Mobarog pahilayo sa iyang
Pag-inusara pag-inusara


-- MARIA VICTORIA BELTRAN
Cebu City, Philippines