8.22.2008

bayolinistang hilaw
















Gipugos ko sa akong Mama
Pagkat-on og tukar
Niining bayolin nga kiwaw,
Suzuki kuno ang pamaagi
Pagkupot niining sanga

Nga gibutangan sa buhok
Sa mga kabayong bus-ok.
Ang primero nakong pisa
Twinkle, twinkle sa mga artista
Apan gahandom ko kang Filemon
Nga namasol didto sa baybayon.

Ang sunod nako nga sonata
(matod pa sa maestra)
Gitawag kuno og Mazurka
Balo lang og kinsa ni siya!
Taod-taod niabot ko kang Mozart
Ug ang akong mga tudlo nilayat--

Naghandum man siguro kining
akong singsing sa pagkupot sa kubing*
Nga hait ang tingog ug taginting.


______________________________________________
* Kubing: lumad nga kahimanan sa pagtukar ginama sa kawayan

-- MARIA VICTORIA BELTRAN
Cebu City, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.