8.12.2008

13 ka paagi pagtan-aw kang maria

(Kay wa man kaibot si Maria kang T. S. Eliot, ipataop kaha nato si Wallace Stevens.)

“…bisan unsaon
Nako pagsul-ob
Sa bakya ni Maria Clara
Motumaw man gyod
Si Maria Victoria.

Wala man ko kaila
Nilang duha.”


-- Maria Victoria Beltran,

"Unsay Buot Ipaibot"




I

Sa 20 ka sapa nga nagbaha,
Ang bugtong butang nga wa maglihok
Mao ang mata sa usa ka Maria.

II

Gihakop ko sa tulo ka pagbati,
Sama sa kasingkasing
Nga gitaopan sa pana sa tulo ka Maria.

III

Si Maria gihuyop sa hangin sa Agosto.
Diyotay tong kalakbit sa iring-iring estatuwa.

IV

Ang anghel ug ang demonyo
Usa ra.
Ang anghel ug ang demonyo ug si Maria
Usa ra.

V

Wa ko masayod unsay pilion,
Katahom sa angay ipasumbingay
O katahom sa buot ipaibot,
Si Maria nga naghubo
O pagkahuman lang gyod.

VI

Gitauran sa yamog ang balisbisan
Og gagmitoyng mga bombilya.
Ang anino ni Maria
Milabang ngadto-nganhi.
Gibadlisan sa panghitabo
Ang anino og
Di-matugkad nga hinungdan.

VII

Ay! Mga taga-Sudlon,
Nganong naghandom mog mga babayeng bulawan?
Wa ba mo kakita giunsa pagtamak ni Maria
Sa tiil sa mga langgam
Nga nag-alirong kaninyo?

VIII

Suheto kog mga hamiling sinultihan
Ug tin-aw, yanong mga huni;
Apan nasayod sab ako
Nga nahilambigit si Maria
Sa akong nasayran.

IX

Sa dihang mitalikod si Maria
Iyang gimarkahan ang ngilit
Sa usa sa daghang mga badlis nga lingin.

X

Kon makakita silag mga Maria
Nga nag-utaw-utaw sa baha,
Bisan ang mga bigaong tigbalitaw
Mapandol ang tingog.

XI

Mibiyahe siya paingon sa Carcar
Sakay sa usa ka bildong karo.
Kausa, natusak siya sa kahadlok
Tungod kay nagtuo siya
Nga ang anino sa iyang karga
Mga Maria.

XII

Ang bukid mitakilid.
Paingon na tingaling manamilit si Maria.

XIII

Gabiing dulom ang tibuok hapon.
Nag-ulan
Unya paingon nang moulan.
Si Maria naghulat
Sa terminal sa Ayala.


-- VICENTE VIVENCIO BANDILLO
Dubai, United Arab Emirates

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.