Sa una natong istorya
Hapit ko maluya
Sa mga hisgot nimo bahin
Sa mga sugyot ni Charles Darwin
Kay wala ko’y hibangkaagan
Sa ilang gipangyamyam.
Gitudlo nimo nako
Ang tugon ni Nietzsche nga nasuko
Tubag ni Goethe nga nagduko
Ug kitang duha naglikoliko.
Nibisita ta kang Heideger
Nga kontra ni Schoppenhauer
Ug niurong ta kang Kant
Nga nahimong bakukang.
Ug kinsa pa galing kadtong
Niingon nga kining kaguliyang
Mabadbad sa panghilawas?
Dinhi na ko nag-ugtas
Kay matod pa ni Kun’g Fu tzu
Adunay gitawag nga shu*
Nga sa akong panumdoman
Miingon, ayaw ipugos sa uban
Ang dili nimo subayon nga dalan--
Mobalik na lang kaha tag hisgot
Sa buslot sa akong atop
Nga gidagit sa hanging gahuyop.
_________________________________________
* shu: pagtuo ni Confucius kabahin sa theory of recopricity
-- MARIA VICTORIA BELTRAN
Cebu City, Philippines
No comments:
Post a Comment