kuwawing

Samtang gayarok ko sa bugnawng Red Horse 

naa’y nangutana: "Unsa ang stream sa Binisaya?" 

Naa'y nitubag: "Tubod!" 

 “Adunay labing haom nga pulong,”
miingon ang bantogang matusalem 

nga mora'g gikan pas’ lasang. “Kuwawing!” 

Gigitik ang akong kilid tungod kay 

ang nadunggan nako morag Kuyaw Wowie. 

Gibalikbalikan dayon namo’g sangpit, 

“Kuwawing! Kuwawing! Kuwawing!” 

Moyawit na unta kos’ akong punchline apan 

naunhan man kos’ amaw nga nilitok og— ay, 

ayaw nalang kay malaw-ay siya 

sa pulong nga Hapon. 

Samtang nagkatawaha mi ug midagayday 

ang serbesa sa akong tutonlan, 

mibalidbid ning balaka 

sama sa kuwawing nga bag-ong napalgan. 

-- MAI SANTILLAN 

Mandaue City, Cebu, Philippines