"Prisohon ko ni!" singgit ni Obat
Ug gidagan ang minahal ni Diw-a.
"Papason ko ni og mosunod pa ka!"
Hulga ni Obat kang Diw-a
Dungan ang paglabay og lapok sa nigukod
Ug gisi sa pipila ka gidagan nga papel.
May tintang nitulo sa dalan.
May kasingkasing nga ningitngit.
Nasayo ang gabii ni Diw-a.
Nikamang siya hangtod naabot ang poso.
Nanghilam-os.
Pilit ang lapok maong daw nadali
Ang tungang gabii.
Gitrapohan ang nawong ni Diw-a
Sa kahayag sa bulan.
Nitin-aw ang iyang mga mata.
Nakaklarong may batong
Gitutukan sa kahayag.
Gipunit ni Diw-a.
Niabante ang kahayag.
Gisunod ni Diw-a.
Nakasubay sa dalan nga may tinta.
Niabot sa samin nga girehas.
Gibuak gamit ang bato.
Napiko ang rehas.
Naigo si Obat nga ningitngit
Ang kanhi makasuwaw nga nawong.
Nisulod si Diw-a sa samin.
Gikuha ang minahal. Ang kaugalingon.
Giguhit sa tinta sa dughan ni Diw-a
Ang iyang minahal ug kagawasan.
Sa kaadlawon,
Nihayag
Ang kanhi gingitngit niyang kasingkasing.
-- DESIREE L. BALOTA
Talisay City, Cebu, Philippines
No comments:
Post a Comment