isay

Sa matag adlaw
Makit-an tika
Dapit sa eskina
Nahinanok taliwala
sa syagit sa mga dyip
Nga nagpabulhot
Nagsabwag sa ilang
Abog sa imong baga

Inig gawas nako sa akong
airconditioned nga opisina
Ang bulingon nga karton
Nga maoy imong
Kadulog matag gabii
Gihipos na
Kay ikaw naglaroylaroy

Nanuktok sa mga sakyanan
Nga nanglabay
Sa imong atubangan

Wala ko maluoy nimo, Isay
Hilabi na gayod kon
modagkot na ka
Sa sigarilyo
Nga gipalit nimo
Gikan sa among
Mga sensilyo.


-- MARIA VICTORIA BELTRAN
Cebu City, Philippines