panahon ni mampor

Karon, dinhi sa akong pantawan
Nagpaduding ang ulan nga sabaan
Mitulo dinhi lapos sa akong atop
Ug ang akong palibot naglunop
Ang akong munimuni gianod
Balik sa panahon ni Mampor
Kaniadtong uso pa ang El Tor
Padulong sa suok sa Agusan
Diin kada eskena taw-an;

Kung malimot kag sulti og tabi
Samtang sa punuan sa Falcata nangihi
Kung mangdanghag ang imong agtang
Ug di ka kakita sa engkantong nag-atang
Kung magpagwapa ka kanunay
Ang itom nga agta kanimo malipay
Unya malimot ka pagpasalamat
Sa mga Diwata nga naghulat-

Mobundak og taman ang ulan
Mokatkat sa among hagdanan
Mosulod sa among kwarto
Diin si Inday nanghinguto
Ug maoy mahimong uso
Ang mga sakit nga abusado.


-- MARIA VICTORIA BELTRAN
Cebu City, Philippines