karong adlawa

momata kog sayo
dili ko mamahaw
manghilam-os
ug magsipilyo

mag-andam sa akong buyot
magdalidali pag-ilis
molabang sa dalan
mokabyon sa naghaguros
ug walay pasensya nga bus
padulong sa pantalan
diin naghulat ang baroto
nga walay katig

molawig ko sa dagat
mokabayo sa balod
molantaw sa panganod
ug sa habog nga tabanog
nga nagtuwadtuwad
sa mga tuyom
nga naghilomhilom
ug pag-abot sa isla
mokawas ko kuyog
sa mga pasaherong
nagdahunog
moangkas sa drayber
sa habalhabal
nga dili moundang
pagpadala ug text
sa akong celfon

miss call pa gyod
wala baya koy load

-- MARIA VICTORIA BELTRAN
Cebu City, Philippines