ang kabangis sa corak* ni diego

Nilupad ang utok
Kang kinsang tino
Nagbansiwag ang kahait sa corak*
Namaybay sa sidsid sa nagsinaw nga kahimanan sa panimalay
Ang mga mahalong kahimanan sa panimalay nga gihubit sa mga animal
Mga mananap nga gibantog sa kagarboso
Apan sa mga kamot ni Diego
Tin-aw ang ilang mga kasakit
Ang tigre nga adunay masulob-ong mga mata.
Ang lion nga adunay hilaw nga pahiyom.

Apan wala mawala kanako
Ang kamatuorang ang dugo nga naglatay sa kaugatan ni Diego
Dugo sa usa ka Giacometti
Mao nga tin-aw kaayo ang paglutaw sa mga tigmo sa iyang mga balak
Tadlas sa kalimutaw sa arti*
Gihubit sa mga pasumbingay
Nikabyon sa huna-huna ang mga ngabil
Sa mga detalya nga urot ang bulok sa kasuko
Sama sa puthaw nga gisugba sa kalayo
Gidukdok sa maso
Gihulma ngadto sa idlot nga papingis
Batok sa mga mapanlupigong ang-ang sa katilingban.

Sipa kayo ang panimalos
Nga nisiwil sa mga sanga sa kahoy ubos sa mga binuhat nga mga talad
Kahoy nga daw naugdaw
Sa nagbagang kasakit sa itom nga mga langgam nga namatog.

Mga itom nga langgam
Nga manuhik sa kaalam
Sa adunahang mga mananap nga magbangkite
Sa kasakit ni Diego Giacometti.

____________________________________________________
* Corak : sa pinulongang Bahasa, ang buot ipasabot “design” sa inenglis
* Arti : sa Bahasa, kahulugan ang buot ipasabot

-- LEO BOB FLORES
Bukit Batok, Singapore