daman

Nagyawyaw ka sa imong pagkatulog
samtang kita nagdulog sa katre
kay wala nato gipanag-iya--
ang habol nga lain ang naglaba,
unlan nga gihigdaan sa tanan
nga nangita'g gamayng kalipay
ning bugnaw nga kalibotan.

Nigakos ko nimo aron ikaw
dili magpiyong nga molakaw
ug dili maligsan sa mga sakyanan
nga nagdali sa ilang biyahe
nga tingali padulong sa bulan.

Naminaw ko sa imong istorya
sa dihang ikaw nagdaman
sa mga kukabildo nga kanimo
nakapahiyom bisan ug kini
dili tinuod, bunga ra sa daman

samtang ako usab
nagdamgo lamang.


-- MARIA VICTORIA BELTRAN
Cebu City, Philippines