sugbo

Krus ni Magellan. Bangkaw ni Lapulapu.
Pusod sa tinuhoang Pilipinhon.
Ganghaan sa kasadpang buhilaman.
Panagsa na lang ang molabay’ng
Mga tartanilya nga daw nagdailos
Padulong sa kasadpan. Nahubsan na sa tubig
Ang sapa sa Pahina, baga na ang taya
Sa mga kanyon sa Fort San Pedro.
Ang mga adlaw di na sukdon
Sa pagsilang ug pagsalop kon dili
Unsa ang kakusog sa kagahob
Sa dalan sa Colon, sa taboan sa Carbon,
Sa liyok sa Fuente Osmeña. Samang
Nanagsambod ang mga kadalanan
Ug ang mga damgo nga nagsubay kanila.
Lisod nang ilhon kon hain man ang matuod
Hain ang imitasyon, kon hain mang bahina
Ang pasundayag, haing bahina ang pangaliya
Sa tinuig nga Sinulog. Sa gal-as nga kagabhion
Ang tanan buot moawit, mosiagit
Sa mga videoke. Ang tanan buot mosum-ok
Sa kalasangan sa kangitngit. Ang tanan
Di na maantigong molingi sa kagahapon…
Sugbo. Asa ko na man karon hikaplagi
Ang tinuod mong kalag?

-- URIAS A. ALMAGRO, M.D.

New Berlin, Wisconsin, USA