ang balay sa tanghaga sa kabangis ni korak

Pipila ka banog sa dila ang nitadlas
Sa lawod gikan sa Formosa
Ug nagkuyog sa pagdagit sa igmat
Nga mga kagang sa Batanes?
Pipila ka pulang mga itlog sa mga bagani
Ang nangabot sa puting baybayon sa mga bayani
Gikan sa mga unod sa dila sa banog sa mga Ibat?
Pipila ka mga nalisoan sa pangutok
Nga mga banog sama ang nagbantay
Sa mutya ni Lao Tzu sa kahiladman
Sa tiyan sa dagat sa kasakit, kaalam ug kalipay?
Pipila ka mga garay nga napuno sa mga armadong mga pirata
Ang nilahos gikan sa Ilana ngadtos' Sitangkai?
Ngadtos' Borneo? Ngadtos' Celebes? Ngadtos' Sumatra?
Pipila ang nakaabot ungad bugno sa mga Ulu sa Bogan?
Si kinsa ang bangis nga haring tigbantay sa bilahan sa yutang Malaya?
Pipila ka tigbas sa kampilan sa kahayag sa imong ulong pahak
Ang gikinahanglang ihapak bag-o ka molupad?


-- LEO BOB FLORES
Bukit, Batok, Singapore