sa akong paglakaw

Pawnga ang mga suga sa poste
nga naglinya dinhi
sa nagkatawa nga dalan
nga atong agianan.
Paandara ang radyo
aron mapawong ang kukabildo,
lumsi ang mga tagay
nga dugay nang nilabay.
Kuhaa ang mga botelya
sa bino, ibabaw sa lamesa
ug biraha ang hapin
nga dinhi nagpabilin.
Badlonga ang mga iro
sa atong lagwerta
nga naghulat
sa akong mga tunob.
Ang kataposan nga sonata
patukara ug isul-ob
makausa pa ang sinina
nga saksi sa atong himaya.
Pangitaa ang akong
mga pulong inig mata
sa abog nga natulog
ilawom sa katre
sa kanhing pagbati.
Kalimti ang mga hunghong
nga sa kasakit niusbong
Yab-i og tubig
ang nikatkat nga kalayo
Kay kitang duha
nasaag na
sa kalibonan
sa atong mga lasang.
Lupad pahilayo
kuyog ang mga ani
sa atong mga gabii
Ug ayaw kalimti-
pawnga ang mga suga sa poste.


-- MARIA VICTORIA BELTRAN
Cebu City, Philippines