sil-ip: pribadong talan-awon sa kisame ni monsenyor agerico

(ngadtos mananag-an nga inig ka-Hulyo 18, 2008 may linog nga makalilisang)

"A 60-year-old church monsignor was found dead yesterday morning in his flat in Quezon City with his pants down in front of a television set that was still switched to an adult network." —TEMPO/Manila Bulletin, Hulyo 18, 2008








Ayaw kog patuoha nga ang mga boring
Dili mangalawat sa unang misa
Kinsay nasayod kon may mga simod
Nangindahay sa ilang kiyod?
Ayaw kog patuoha
Nga puti ray kolor sa sotana.

Bugnaw ang lanog sa kampana.
Kay sakristan gikabuhig sinuka
Sa gipulutang ostiya
Unsaong sagol hepa ang laway sa tigmasa
Sa kanto-kanto nga panaderiya.
Maoy paagi sa iyang barikada
Kay wa kasuweldohig uska semana.
(Busa, maypag manabla)
Ayaw kog patuoha
Nga ang saysenta wa nay lana

Samtang ang kompesaryo
Gitilaan sa asupreng kandela sa impiyerno
Makapaso sa dila; makalangsi sa luha.
Wala pay kubal imong kalimutaw
Nianang salidang tambal sa kahidlaw
Ayaw kog patuoha
Nga ang bugoy ray boyorista

Inigsalta sa imong aligato
Sa pultahan sa impiyerno
Nagpapayb siks si san pedro
Pangbayad sa pay per view
(Ambot naa ba kahay cable didto?)
Saludo kos imong panag-an
May linog sa usa ka dapit sa kalibotan—
(Tan-awa, nabungkag ang portada sa simbahan!
Naigo sa epicenter sa imong tinagoan)
Pero ayaw gyod kog patuoha
Nga ang langit naa ras bibliya.


-- OMAR KHALID
Medellin, Cebu, Philippines