7.17.2008

bagyo sa balaknong kinabuhi


















Kada segundo naghuguros ang unos
Dinhi sa sulod sa akong hunos
Diin akong gitipigan ang mga pulong
Nga sa akong alimpulo nag-alirong.
Usahay signos numero uno
Ug ang akong bagulbagol mobuto,
Moabot na galing sa numero dos
Manabako na ko niana og tustos.
Sa panahon nga ang signos numero tres,
Mosabat ko sa singgit sa bisibis.
Numero kwatro, motago na ko sa kwarto.
Numero singko, masuko na ko.
Apan inigpatak sa sais nga numero
Mao na kini ang peligro,
Pugngan ko na kining dagang
Nga maoy akong hinagiban
Kay mahadlok ko sa unos nga naghaguros,
Sa numero syete nga signos
Mapalid na ang mga pulong
Lapos sa sementong bungbong
Ug ang mga higanteng balod
Molamoy sa tanang balaod
Nga maoy nagpugong
Sa nagbuswak kong mga pulong.



-- MARIA VICTORIA BELTRAN
Cebu City, Philippines

1 comment:

AGD said...

kusuga aning unusa,
bagyong la bamba.


Daghang salamat sa mga maniniyot nga gapaambit sa ilang mga hulagway sa Google ug Flickr.