kon mahimo pa unta

Kon ang mga luha mahimo pang
Modaligdig sa mga aping sa kabungtoran
Mosanap unta ug molunop kanimo
Ang kaguol nga nag-ulong
Dinhi ning akong dughan.

Kon ang mga balod mahimo pang
Buklaron sama sa mga papel
Mabasa mo unta ug mosantop kanimo
Ang kahapdos nga akong gisulat
Sa mga panid ning lapyahan
Sa akong pag-inusara.

Kon ang mga pinitik sa kasingkasing mahimo pang
Molupad sama sa mga gapasan
Mopunting unta ug motaroy sa imong balatian
Ang sima sa akong gugma nga gisubhan
Dinhi ning pandayan
Sa akong mga tinguha.


-- URIAS A. ALMAGRO, M.D.
New Berlin, Wisconsin, U.S.A.