katakombas sa kahilom

di mamatngonan
ang pagkapungil
sa dahon sakay
sa ayaay nga hangin
hangtod ianod, ianod, ug ianod
sa lapyahan sa paghinuktok.

ug manghupaw
ang blangkong papel
sa wasig-wasig nga
pulong sa maghahalad;
maglalang og daghang damgo
ang magtiayon sa payag.
sa unahan, di matitik ang pagtapos
sa sugilanon sa apohan.
ug ang tabyog sa duyan namunit
sa pangagho sa kawalaan;
sa masusong gitukawan sa
sa nagdukang inahan.
ang nota sa kitara
gihipos na usab sa kataposang
sibya sa mga gangis.
wala nay mabati
bisan ang halayong tawag
sa gimingawng hinigugma
usa na lang karon ka hanap nga kasikas
sa mga yamog sa balili.
gilamoy na sa mga pahoy sa humayan
ang kataposang hilak sa linuiban.
ang tiki mihawok
sa mga hanap nga tunob sa tugkaran.
ug ang iro giurom sa
iyang paghangad sa buwan.
ang karaang sam-ang sa unahan
padayong nagsamkon og liboan
ka mga igsusugilon nga gihikom
lamang sa siot nga lubnganan.

samtang sa lawod:
ang sakayan hilom nga
nagpanaw, nagpanaw,
rumbo sa laing dunggoanan—


-- OMAR KHALID
Medellin, Cebu, Philippines