karong adlawa mamintal ko, mahal

(winisikan sa balak nga Mr. Blue ni Michael Franks)

















Pintalan nako’g blue akong kwarto
sama’s dagat sa pantalang gidunggoan
sa akong mga damgo kaniadto samtang
namaroto ko ug nagkalingaw og pasol
sa mga bituon nga gisaliyab sa langit
didto sa ugmang way sama ka ngitngit.
Pintalan nako’g blue akong pultahan,
mga bintana, ug ang tanang agianan
sa magsulod-ug-gawas-nga-kamingaw
lakip kining kahidlaw nga mora’g amaw
moyuhot la’g lusot bisa’g way labot,
ug pwerting puwaha’g lubot. Pintalan
nako’g blue ang akong kasingkasing
aron blue na sad ang bulok sa gugma
imbes pula. Basta mamintal ko mahal,
pintalan nako’g blue akong kalimotaw
aron blue na lang tanan akong makit-an.
Gusto nakong sud-ungon karon dayon
ang akong gibati nga dili ka pa mopauli.

-- NOEL D. RAMA
Clinton, Maryland, USA