exodus

Mitubo. Mitubo ang puwa nga rosas
Sa impiyerno sa akong galamhan
Sa dihang akong gitalikdan, gibiyaan
Ang akong barungbarong. Asa na man lang ko padung?
Asa? Asa?! Human makumkom
Sa mangtas ang akong paraiso,
Iya sang gigusbat ang dagway
Sa akong kaugmaon.
Giminyo niya ang kahayag ug kangitngit alang nako.
Gipiangan niya ang akong pagluhod
Sa iyang atubangan
Barumbadobarumbadobarumbado
Ang iyang bahakhak! Irong buang ang iyang balatian!
Bisag maghimo ko og kadagatan
Sa luha, wa na koy mahimo.
Pagaw na ang akong pagbakho. Mobiya na ko.
Ang Pagsabungan usa ka dagaw oo. Dagaw!
Karon, tadlason ko
Ang batoong laberinto
Paingon sa Amihan. Tadlason ko!
Apan. Kon madagma ang akong panan-aw?
Ah, bahala na.
Mopadayon, mopadayon, mopadayon ko
Bisag abstrak ang unahan
Bisag di ko mahagkan
Ang bag-ong bayhon sa banagbanag!


-- KEVIN A. LAGUNDA
Mandaue City, Philippines