lima ka libo ug usa ka balak

Inahan ko nga inahak
sa lima ka libo nga mga anak.
Usahay sila mohilak,
panagsa usab mobahakhak.

Pareho sa mga bitoong matahom
nga sa matag abot sa dulom
mosidlak sa ilang pahiyom

ug modan-ag sa paghinumdom.

Susama usab sa mga tabanog
nga nanglupad ug nanaog
apan kanunay nagsaulog
kuyog sa saba nga dalugdog.

Anggid sa mga misteryo
nga gakos sa mga sementeryo
nga dugay na bayang nauso
dungan sa mga bulilyaso.

Unsa man gyod diay ang timailhan
sa usa ka balak nga adunahan:
ang ila ba sa ilang dughan,
sa pantog, ug sa bilahan?

Kini nga balak akong gibunyagan
nga karon maoy kamanghoran.
Kining mga anak nga gibuhian--
Sila bayang tanan wala'y amahan.

-- MARIA VICTORIA BELTRAN
Cebu City, Philippines