asin

1.

Niadtong pagbunyag kanako
didto sa karaang simbahan,
gihungit ako
ug usa ka pudyot sa asin.
Una ko kadto’ng pagtilaw
sa kaasgad
ning atong kalibotan.

2.

Duha ka handumanan
ang gibilin kanako
sa nagkatunaw
nga mga tunob
sa asin.
Ang kaparat didto
sa akong dila
ug ang kahapdos
sa akong mga samad.

3.

Dugay ko nang gipangita
kadtong asin
nga akong ipunto
ning tab-ang nga sabaw
nga gidulot kanako
ning panaksan
sa akong kinabuhi.


-- URIAS A. ALMAGRO, M.D.
New Berlin, Wisconsin, USA