class reunion

Hikaplagan gihapon
Sa nangita’ng mga tudlo
Ning atong panumdoman
Kadto’ng daang hulagway
Niadtong atong klase. Tan-awa
Ang lunhaw ta’ng mga nawong.
Mga gihay
Nga sa usa ka gihawirang gutlo
Gihugpong ug gikuptan
Sa lumalabay’ng pungango
Sa panahon.
Nahinumdoman mo pa ba
Kon kinsa kadto’ng
May semento sa napiang niyang bukton?
Kadto’ng gipili nga maoy mokupot
Sa timailhan
Sa sayo tang mga kasakit?
Bisag gigum-os na sa mga tuig
Wa pa mapanas
Ang pinugngan tang mga pahiyom.
Karon, ning gabii
Sa usab tang panaghiusa
Nagpanagana ako pag-ila
Sa tagsatagsa ka mga nawong.
Ginoo, hinaot unta
Nga kadto’ng mga gihay
Nagpabilin pa
Sa ilang pagkahugpong
Ug pay nangatagak
Samtang ang akong kamot
Naghinay pagkurog
Nga naggunit sa bugnaw nga baso
Nga karon di na puno
Sa tam-is nga alak.

-- URIAS A. ALMAGRO
New Berlin, Wisconsin, USA