zoo

Dunay mga halwa nga gitawag og kahilom
nga nag-ulang niadtong mga imoha
ug niadtong di mo makab-ot.
Dunay mga sulab nga gitawag og mga mata
nagsan-ag daw mga baga
nagsidlak daw ngamig nga asero.
Ug dunay mga utok, oo, dunay mga utok
sa luyo sa kada halwa
sa luyo sa kada mata.
Dunay mga utok nga nagkanayon:
Wa pa mahuman
ang atong mga pagpangayam.

Unsa may kalainan kon diing kilira
sa halwa ang imong nahimutangan?
Ang nagtan-aw ug ang gitan-aw parehong
wa magkasinabtanay.
Kay mao ray ilang naamgohan
ang nag-ulang kanilang mga rehas--
Bildo, kahoy o puthaw
kini pulos mga salamin
diin sa hilom sila nanagtutok
ngadto sa kataposan nilang pag-inilhanay.


-- URIAS A. ALMAGRO

New Berlin, Wisconsin, USA