dinhi ug didto

"Praise the world to the angel, not what can’t be talked about.
You can’t impress him with your grand emotions. In the cosmos
where he so intensely feels, you are just a novice. So show him
some simple thing shaped for generation after generation
until it lives in our hands and in our eyes and is ours.
Tell him about things. He’ll stand amazed…"
-- Rainer Maria Rilke, The Ninth Elegy, Duino Elegies
















Unsa man, ning atong mga hinipos,
ang labing bililhon? Unsa man
ang bikingon ta unya sa kataposan
tang paggikan, puston ug isulod
sa mga maleta sa atong mga kawili?
Daghan ang atong ning-ilhan
apan ning-ilhan lang
sa ilang mga ngalan. Daghan usab
ang mga nahibulag, nahiwani
ug hikaplagan ta lang pag-usab
inig-ukay ta sa mga suok
sa atong panumdoman.

Gitadlas ta
ang daghang kabaybayonan--
sa unsang katarongan-- aron
ba lang pagbilin og mga tunob?
Hisayri nga unya sa atong paglingi
mao ray atong hikit-an
ang ilang pagkahanap,
ang ilang pagkapanas.

Maoy angayan tang hambinon
kadtong nagdilaab nga mga kasiga
niadtong gidagkotan tang mga daob.
Ayaw nag tagda
ang nabiling mga agiw
kay sama sa tanang mga abo
huypon kana inig agi
sa naghuros nga hangin.

Hambinon ta ang gipupo tang mga bulak
ug dad-on ta sa atong mga pag-inusara.
Dad-on ta sa kanunay
bisag asa kita isangpot
ning taas tang mga pagpanaw.
Ug unya
inig-abot na sa higayon
nga ang atong mga kalag
wa nay mga kaila
ug panahon na
sa katapusan tang paglangyaw,
hinumdomi,

Hinumdomi nga inigdangat ta
didto
sa tabok nga dunggoanan
maoy angayan tang isaysay
ngadto niadtong mosugat kanato
kadtong atong mga ning-agian
kadtong atong mga ningkit-an
kadtong atong mga ningsaksihan
ning makausa ra natong paglabay
dinhi
ning atong kalibotan.


-- URIAS A. ALMAGRO, M.D.
New Berlin, Wisconsin, USA

Hulagway: TITO ALQUIZOLA