tambag ngadto sa batan-ong magbabalak

ayawg kapingot kon sa imong pagsuwat
adunay pulong nga mokalit lag
patim-aw nausab pag-abot nimo
sa ulahing bahin sa imong balak
human mo kini papasa
sa pipila na uyamot ka higayon

maayo tingalig dawaton mo na lang kini
pasagdi kon asa siya gustong mopahiluna
sama sa iring way tag-iya
nga nahipunta sa imong tugkaran
halos dili mo na mabati ang iyang ngiyaw
nga bunga sa kagutom ug kauhaw


-- VICENTE VIVENCIO BANDILLO
Dubai, United Arab Emirates