pakigbugno sa manulonda sa mga balak

Tinuod siguro--
Ang tighuyop sa budyong ni
anhing Whitman
O kaha kang Neruda
way kalainan
sa yutang
natabunan lamang
sa espalto o semento
sa kasamtangan.

Apan kon pilo-piloon ko kaha
ang mga nangalupyak
nga dalan
nga akong gibaktas
padulong kanimo
ug tipigan ko ang matag gihay
niini sa ilawom
sa akong lantay
aron bisan sa akong
paghinanok
hitultolan ko ikaw.

Ug bisan didto
sa walog
nga way kinutoban
ang giladmon,
sama kang Jacobo
human sa ako unyang
pagyukbo,
makigbugno ko.

Lugpitan ko
ang imong mga lutahan.
Layugon ko
ang imong pagdumili, ug
dili ko gayod ikaw buhian
hangtod imong
gahinan og luna
ang matag uha
sa mga garay sa akong
matag kaliwat.

Ugma.


-- GINA MANTUA-PANES
Cebu City, Philippines