sa tsiks nga akong kasakay

Buot lang unta kong moluklok
Sa kinauyokan sa imong kandiis,
Way sapaya’g adto ako pulota
Sa tumoy sa imong tamihid;
Buot ko lang untang tukibon
Ang tanghaga sa imong kaanyag,
Kay samtang kita nagtupad
Ang hangin way laing buhat
Nagpatuya’g panimhotsimhot
Sa buhok mong nagdunghay
Nga gibubhoan, gilimisan
Sa gininhawa sa kabulakan.
Misantop ang akong kataka
Sa san-glas nga maayong pagkahulma
Sa panagway mong gilalik
Sa tinakdoan sa ilong ug aping.
Nagkinto akong nanagana
Sama sa talisik sa Agusto
Ibabaw sa lapad nga laguna
Sa lunhaw mong tesirt
Kay simbako makaungkag
Sa duha ka nanuybong pungango,
Imong inampingan
Kay gitagana sa lain.
Pag-urong sa dyepney, nagbag-id
Ang kilid sa akong kasingkasing
Ug ang tumoy sa hilaw mong tuhod;
Nanag-awit ang kalanggaman,
Nanglukso ang mga lukton,
Mikiriw ang kadahonan
Sa bukiran sa akong kaikag.
Apan sa takulahaw
May mihuot sa akong tutonlan,
Mikatol ang akong panan-aw,
Kay sa pagtangtang mo sa san-glas,
Gilugod mo paghinay
Ang mga mata mong gipiskat.


-- RENE ESTELLA AMPER
Boljoon, Cebu, Philippines
_____________________________________________________
Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.