batok sa banggiitang kasag

inig kamang sa dulom
moundang ka sa paglumlom

kay imong ipurongpurong ang korona
nga gikawat nimo gikan sa balyena

inig katulog sa bulay-og
ug tagawtawan nga dalugdog

mokabkab ka sa akong balas
ug didto sa dagat manginhas

Inig katkat ko sa punoan
sa lubi nga dili taw-an

birahon nimo kining akong palda
aron ang akong sampot mosalida

pagbantay anang imong mga paak
bangiitan nga kasag

kay unya ikaw akong ilung-ag
dayon supsupon nako imong kalag


-- MARIA VICTORIA BELTRAN
Cebu City, Philippines