kadtong bato’ng ligsanan

Miundang na sa iyang pagtuyok ang daang bato’ng ligsanan. Sama sa planeta’ng nawad-an sa gahum sa pagbitad, naglutaw na lang kini sa ngitngit niyang luna sa kosmos sa kalimot. Ang duha ka bato’ng malingin usa ka paresan sa mga ligid nga bisan sa ilang pagkayano lisod nga usbon pag-imbento. Mga ligid nga sa ilang pagtuyok gikan sa langob nga atong gigikanan dugay nang nahiyosan sa hangin gumikan sa mga suyak sa buhilaman. Ang tigsong kahoy nga iyang puloan nawad-an na sa iyang kahamis ug kasinaw. Ug ang lungag nga kanhi giaboran sa halop sa mga lugas karon gilawalawaan na ug nabulit sa baga’ng abog. Kining daang ligsanan duha ka malinging butones sa mga ohales niadtong sapot nga dugay nang gihukas sa panahon.

Karon, ning akong paggunit sa uga niyang puloan, sa makadyot akong gipangandoy nga kon mahimo pa, tuyokon ko kini pagbaliktad– atras sa panahon, aron mahikuyog ako niadtong di maihap niyang mga pagtuyok, ligid sa mga batoong dalan sa katuigan.

-- URIAS A. ALMAGRO, M.D.
New Berlin, Wisconsin, USA