Kagabii samtang ako nagkatulog,
nagdamgo ako– balaang lamat!
nga dihay usa ka busay nga nag-agas
gikan sa akong kasingkasing.
Miingon ako: diin mang tinagoan nga tuburan,
O tubig, ang imong gigikanan pag-anhi kanako,
tubig sa bag-ong kinabuhi
nga hangtod karon pa gyud nako hitilawi?
Kagabii samtang ako nagkatulog,
nagdamgo ako– balaang lamat!
nga dihay tabog sa putyokan
dinhi sa sulod sa akong kasingkasing.
Ug ang mga bulawanong putyokan
naghimo og puti’ng salag
ug tam-is nga dugos
gikan sa nangagi kong mga kapakyas.
Kagabii samtang ako nagkatulog,
nagdamgo ako– balaang lamat!
nga ang usa ka mainit nga adlaw
nagsilaob sa sulod sa akong kasingkasing.
Nagsilaob kadto kay ako mang nabati
ang kainit nga daw gikan sa nagbaga’ng dapog,
ug adlaw kadto kay naghatag mag kasiga
nga mipalugmaw og mga luha sa akong mga mata.
Kagabii samtang ako nagkatulog,
nagdamgo ako– balaang lamat!
nga ang Ginoo maoy dinhi
sa sulod sa akong kasingkasing.
Gihubad ni:
-- URIAS A. ALMAGRO, M.D.
New Berlin, Wisconsin, USA
No comments:
Post a Comment