samtang gabilar sa haya sa usa ka dalagang aktibista

Sa imong paghigda sa lungon
Imo kining gipahuot aron
Ang demokrasya dili masulod sa usa ka kahon.
Hinaot ang bulok sa kandilang gidagkot
Magpabilin untang sama kapuwa sa dugo
Mga miawas gikan sa imong lawas.
Dili unta namo itugot nga ang lanog
Sa pusil moagaw ug molamoy sa imong tingog.
Hinaut pod unta nga ang kangitngit
Mao'y motapok namo. Ug sa panahon
Nga wala na mi madunggan nga kamatuoran,
Hinaot nga aduna'y mokutlo sa mga pulong
Nga wala nimo masulti. Kining biskwit ug kape
Nga gidalit kanamo di tuod Pan og Bino apan
Ang among pasalamat ania dawata
Kay tungod niini nagpabilin mi'ng mata.


-- BAL MARSIUS VALDEHUEZA
Cebu City, Philippines