tubaan sa montaneza

Bisan ang lagong may kapuslanan,
Tipik sa bahal, tipak sa handumanan;
Sugong ug kawit adunay kalambigitan
Sa tawhanon tang kaagi. Bisan ang hungot
Nga dugay nang gipadaplin, gitahan ngadto
Sa mga kaka sa katuigan,
Gipunsisokan sa mga lama sa kanhi tang kaagi.

Ang tubaan sa Montaneza talihirig
Sa kasadpan. Ang lingkoranan
Niyang kawayan simpig sa init ug ulan
Gitapok-an sa mga tunob sa tuba
Sa igmat tang kabatan-on.
O ang mga lusok sa atong mga katawa
Nga kanhi nanglugmaw sa mga mata sa kahaponon
Gihipos sa hangin ug giluklok
Sa mga pilo sa kagahapon!

Kinsay magdumili kon moduaw
Sa karaang tubaan sa Montaneza ang kawili
Sa kabatan-on subay sa kaugatan sa handurawan?
Angkonon ko ang tanang kamingaw:
Ang kitara kong bagol nga namiyahok
Sa balikig nga haligi, hungot ug sugong
Nga gibitay sa buslotong bungbong,
Tuhod nga naghirig paingon sa kasadpan,
Kasingkasing kong gibugtaw
Sa mga pinitik nga dili na madangaw,
Kagulkol sa mga bukog
Ilalom sa luag nga lubnganan.

-- RENE ESTELLA AMPER
Boljoon, Cebu, Philippines
__________________________________________________________
Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.