abton sab ko’g kamingaw sa mga karaang aseras sa pelaez

Abton sab kog kamingaw
sa mga karaang aseras sa Pelaez:
ang mga latayan nga tabla
nga nabuktot sa kanunay kong mga tunob
sa akong pagbalikbalik
paingon sa tulunghaan
nga karon nabulit na sa mga buling sa panuigon
ug gibaharan nang langkatan
sa ilang baroganan aron ihiklin
tipon sa mga gabok nga tigkahoy;
ang mga sementong tikanganan
nga maisogong nakigharong sa panahon
apan gibuntog sa mga sagbot
nga mikulikot ug mikulikot
sa mga liki sa semento
ug nahimong sanglitanan sa atong mga tinguha.

Ang akong pamayhon sa pagkakaron
sama nag kabug-at sa mga dahon
nga mosulod sa kabuntagon
ug mapulak sa kilumkilom
bisan pag sagakayon sa usa ka pudyot nga awit.
Ang dangga sa kabulakan ug ako
nag-anam nag kalayo
gikan sa nga karaang aseras sa Pelaez.
Natahap ako nga ang kamingaw
maoy tinan-awan sa kabalaka,
dili ikapaniglain.
Ug kon ang mga kaadlawon mangurog na
sa ilalom sa akong kasingkasing,
ug kon hagiton ang mga mata sa kaibog
mobahag na ang ikog sa balatian
kay ang galamhan magdumili,
unsay akong ikabilin sa kalibotan?
Usa ka sapnay nga abo,
usa ka tapok nga bukog,
kalag nga nagumon sa nagsandig nga gabon.


-- RENE ESTELLA AMPER
Boljoon, Cebu, Philippines
___________________________________________________

Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.