ang manulonda nga nahimuwag sa panon

1

bisitang naghangos
kansang mga pako hinimo
sa mga tipaka sa kinhason
nga gikuyogan sa kahayag
nga karon nagbitay
sa akong ulohan daw suwab
sa kahilom
tan-awa
kuliton ko ang akong nawong
aron himoong bagtingan
ginamit ang bato-balani
kong mga kamot
ug gam-on kong salag
ang akong kasingkasing
nga way kasayoran kabahin
sa dagat nga gigapos
sa iyang mga sapa

2

kon moingon ko nga tanang
mga bulak managsama
dili kini tungod kay
nasud-ong ko na silang tanan
laray sa gihay nga daw kuko
sa kahapdos
bisan tuod miabot ka
nga wa pa matapos
ang akong pagsud-ong
sa pag-inusara
sayod ka tingali
nga dili ang tanang tighingalan
managsama

3

dili tingali ta mahidangat
sa sinugdanan
nga maoy atong gipangayo
kon ang atong mga tudlo
mobiya sa mga aninong nagpasad
sa baybayon
bisan tuod ang ilang mahikap
mas duol sa hagawhaw
kay sa atong kahigwaos
sa kanunay
gikumkom ta ang mando
nga latason ang nagbuntaog
nga lawas sa pagmahay

4

sa dili pa ta moluwan
sa misanap nga kahayag
moubog una ta
sa aso nga mituyhakaw gikan
sa mata sa usa ka isla
nga kamot na lang ang migimaw
kinsay nasayod
basig isangyaw
sa mopatim-awng panganod
ang kamatuoran kabahin
sa miagi tang kinabuhi
ug santaon sa kasapaan
ang laraw sa umaabot pagdumili
sa gihandom tang kalinaw


-- VICENTE VIVENCIO BANDILLO
Dubai, United Arab Emirates