ang salamin

alang kang W. S. Merwin

Ang tanang pultahan balit-aron sa damgo, ingon nga gisud-ong kini diha sa usa ka salamin. Way katulog, ni bisan kinsa, nga makalikay niini. Gani mahimong handurawon nato nga mangahanaw ang mga bayhon mismo nga nahitala sa salamin. Unya unsa na kahay mopuli sa dapit nga nahimutangan karon niini? Kon pananglit adunay mga tawo sulod sa lawak niadtong higayona, unsa kahay ilang gipangdamgo, pipila ka andana ibabaw sa kahilom nga naghari karon? Dili ug dili gyod mosantop sa ilang hunahuna nga diay dihay salamin dinhi, diin tuis ang tinuod nga dis-og sa mga anino ubos kanila nga malinawong nahikatulog. Sulod sa damgo mahiugbok lang gihapon ang mga tawo atubangan sa usa ka salamin nga maoy salamin sa damgo nga ilang nasinati, ug unya mapawong ang mga suga, ug nasayod sila asa dumdoma ang labing duol nga tamboanan. Inighangad nila sa langit, mahimut-okan sila kay sa takulahaw himatyon na ang bulan, ug sila tagsa-tagsa diayng nag-inusara sa kaugalingon nilang kagabhion.

-- VICENTE VIVENCIO BANDILLO

Dubai, United Arab Emirates