hunghong-hupay sa gibasura nga munyeka

Maayo na lang gani kay wa’y sulod 

Imong dughan. Dili gyod mabug-atan 

Sama anang bugaw nga buot magbuy-od 

Palayo sa kapuol sa iyang gibarogan 

Sa aseras diin ang dag-om naminhod. 

Wa’y kalainan sa dalagita sa Kamagayan 

Nga gilumsan sa lilo sa mga kiyod. 

Maayo na lang gani kay wa’y balhibo 

Imong panit, ug dili gyod mamugnaw. 

Sama nianang puya samtang nag-abibo 

Ang mga ilaga. Gilaylayan sa mga langaw. 

Maayo na lang gani kay wa’y duwaan 

Ang batang pinasagdan. Wa’y pili 

Nga mipunit nimo gikan sa basurahan 

-- MICHAEL U. OBENIETA 

Topeka, Kansas, USA