ang sambol nga kangitngit

gaan og buot alagad sa kausaban
tighanduraw sa luspad nga hangin sa lanog
sa hagawhaw sa abog
sa kupo sa anino nga wa mapulak wa mokanaw
gikan sa mga mata sa hagip-ot
nga ulan sa panumdoman
nga mibuhagay daw alimyon sa mga bituon
daw kidhat sa kamingaw nga gikudlit
sa dilaab sa daob sa kilumkilom nga nag-inusara
sa miaging usa ka gatos ka gutlo
samtang nagdinakpanay
ang mga dahon nga naghupot sa yuta
dihay miturok nga bulan taliwala kanato
dihay kasaysayan sa kahilom
nga wa mokanaw wa mapulak sulod kanato
diin inanayng mikuyanap
ang sambol nga kangitngit nga dili mahikap
sa gibinhod tang mga palad


-- VICENTE VIVENCIO BANDILLO
Dubai, United Arab Emirates