oda alang sa pipila ka lalag nga mga bulak

(hubad sa balak ni Pablo Neruda)

















Supak sa asul nga lihok sa mga asul,
ang dagat, ug supak sa langit,
ang pipila ka lalag nga mga bulak.

Ang Oktubre taliabot na.

Ug bisan tingali’g labing importante
nga ang dagat magmugna
sa iyang mga sugilanon, sa iyang misyon,
ang iyang libadura
muolbo
sa bulawanong kabalasan
sa usa ka lalag nga bulak,
ug ang mga mata
nga gihigot sa yuta,
mopahilayo sa dakong dagat ug sa iyang mga lapdos.

Kitang tanan abog.
Dili hangin, dili kalayo, dili tubig,
kondili
yuta,
yuta ra
ang atong sangpotan,
yuta
ug tingali pipila
ka lalag nga mga bulak.


Paghubad ni:
-- URIAS A. ALMAGRO, M.D.
New Berlin, Wisconsin, USA