hangyo sa hingatulog nga hinigugma

bisan karon lang buntaga
hatagi kog pipila pa ka gutlo pagtagamtam
sa nagkahanap nga dan-ag
sa nahibiling mga hagawhaw sa katulogon
diin way gipahamtang kanakong obligasyon
nga mahimuot sa hamiling
mga tulumanon sa usa ka banay
nga nagtuong tugob ug takos kini
sa panalangin sa Diyos
ug sa tawo (ug unta mapasaylo mo ako
kon sultihan ko ikaw nga mas ikalipay
kong manimuyo didto sa hagukang kalibotan
nga gitanyag kaniya
nga sinati sa kabililhon sa damgo)


-- VICENTE VIVENCIO BANDILLO
Dubai, United Arab Emirates