salamin

Tan-awa ako,
matod pa sa itom nga tambayawan,
nagtunton ning usa ka lugas
nga tago’ng lanot.
Sa ubos, ang linaw
gipaibabwan sa way timik nga kasin-ag
sa salamin sa kabuntagon.
Pagmata na ug dali uban kanako.
Uban ning akong pagtabyogtabyog
ning pindulo sa taknaan sa kapalaran.
Uban, hangtod kitang duha magdungan
pagpangahulog,
pagpakabuhi ug pagkamatay
sa mapusgay nga salamin
sa ngamig nga tubig–-
mahanaw uban
sa usa ka gamay nga lumalabay’ng lilo.


-- URIAS A. ALMAGRO, M.D.
New Berlin, Wisconsin, USA