alingawngaw sa kagahapon

Pagkatam-is handumon
Ang alingawngaw sa kagahapon,
Handurawan sa tumang kaputli
Himayang dayon niining kinabuhi.

Pasiplat, sa langitnong pahiyom
Sa damgo lang salag sa paglaom
Anino sa kandiis mo ako ulipon
Usahay magahilak ang mga bitoon.

Rosas sa kabos kong tanaman
Pagbating tunay walay utlanan,
Bisan mga dahong laya akong halaran
Hangtod sa mamingaw kong lubnganan.


-- ARTURO J. PAMAONG, M.D.
Missouri, USA