didto sa fuente osmeña

Niadtong lingin’g salamin sa naglukso-
Lukso’ng tubig, akong ningsiklapan
Ang daklit nga paglabay
Sa ngitngit ug hayag nga nawong
Sa nagdali kong kabatan-on.
Didto, sa sulod sa usa ka lusok sa silaw
Ang batan-on kong kasingkasing
Mihulog sa iyang hanap nga anino.
Didto, sa usa ka tulo sa kangitngit
Ang naglibog kong kalag wa makakita
Sa pagpamilok sa kahayag.
Nahimundom ako
Sa nanglabay’ng mga gutlo
Diin akong gisud-ong
Ang gilay-ong buot kab-uton
Niadtong sihag nga mga kulamoy sa tubig
Nga daw tin-aw’ng mga dugo
Nga naggikan sa pinitik
Sa tinipigang mga kasingkasing.
Ug nahinumdom ako
Sa laing mga gutlo
Nga ako milingkod
Niadtong semento’ng mga lingkoranan
Diin sa ilang mga ibabaw
Ang mga lapis sa pag-inusara
Miguhit sa mga inisyal
Sa ilang mga kalaay.
Wala, wala akoy gibilin
Sa daghan kong mga paghapit
Niadtong gamay’ng kalibotan
Sa nangagi’ng mga Sabado ug Domingo
Sa ninglabay kong kinabuhi.
Wala, gawas sa akong pagpakigtagbo
Sa daghang mga nawong
Nga nanglabay usab
Niadtong lingin’g salamin
Nga sama sa akoa
Way mga ngalan.

-- URIAS A. ALMAGRO

New Berlin, Wisconsin, USA