Kining akong silingan
matod pa nila banggiitan
kay hapit tanang butang
nga iyang gisudlan
molambo ug molipang.
Sa tanto nakong gansilyo
pagbatbat sa iyang sekreto
niabot ko sa mga kalayo
nga gidagkotan sa iyang posporo
nibagting sama sa kampanaryo--
kay iya kining pagatuthoan
sa hangin nga gikutlo sa tutonlan
unya pagkahuman bahogan
og dahon nga gamhanan
hangtod ang kaiinit matagamtam.
Bantayan sa adlaw ug gabii
hangtod motubo kining binhi
sa pinitik sa dughan
sa akong silingan nga banggiitan--
kay matod pa niya
ang kalayo adunay kinaiya
nga kung mawad-an sa siga
mangluod og molakwatsa.
-- MARIA VICTORIA BELTRAN
Cebu City, Philippines
No comments:
Post a Comment